Arngrímur Viðar Ásgeirsson

Ég er fæddur og uppalinn á Borgarfirði eystra þar sem foreldrar mínir voru sauðfjárbændur og ferðaþjónustuaðilar ásamt því að sinna öllum hinum störfunum sem bjóðast í litlu samfélagi. Eftir grunnskólagöngu í fámennum samkennsluskóla á Borgarfirði lá leiðin í Eiðaskóla og Menntaskólann á Egilsstöðum þar sem félagslíf, íþróttir og hljómsveitastúss blandaðist við námið. Á sumrin vann ég í verslun, frystihúsi, byggingarvinnu og við búskapinn og bý enn að þeirri fjölbreytni sem borgfirskt atvinnulíf bauð upp á. Síðan lá leiðin í Kennaraháskóla Íslands þar sem ég útskrifaðist 1992.  
Ég stundaði kennslu og íþróttaþjálfun í um sex ár víða um land og fór þá til Íþrótta- og ólympíusambands Íslands þar sem ég starfaði við almenningsíþróttir og uppbyggingu þeirra. Árið 2001 flutti ég aftur heim á Austurlandið og kenndi við Hallormsstaðaskóla og síðan Brúarásskóla ásamt því að koma að starfi UÍA og varð þar framkvæmdastjóri um tíma. Í framhaldi af þeim góða tíma í kennslu fór ég að huga að uppbyggingu ferðaþjónustu og skipulagi ferða á Austurlandi og hef síðustu 14 ár meðal annars starfað að uppbyggingu, vöruþróun, markaðssetningu og rekstri Ferðaþjónustunnar Álfheima á Borgarfirði eystra auk hliðarverkefna í nýsköpun og verkefnastjórnun.
Ég hef sótt fjölda námskeiða og áfanga tengdum verkefnisstjórnun, nýsköpun og þróunarstarfi. Í dag er ég framkvæmdastjóri Ferðaþjónustunnar Álfheima og er búsettur á Egilsstöðum.